स्वास्थ्यकर्मीलाई बिदामा नबस्न निर्देशन

नेपालगञ्ज – कोरोना भाइरसको संक्रमण भित्रिन नदिन उच्च सावधानी अपनाएको नेपालगञ्ज उपमहानगरपालिकाले स्वास्थ्यकर्मीलाई बिदामा नबस्न निर्देशन दिएको छ ।
कोरोना भाइरसविरुद्ध अपनाइएको सतर्कता र भावी कार्ययोजनाका विषयमा शनिबार आयोजित स्वास्थ्यकर्मीसँगको अन्तरक्रियामा स्वास्थ्य शाखा प्रमुख रामबहादुर चन्दले स्वास्थ्यकर्मीलाई बिदामा नबस्न निर्देशन दिनुभयो । स्वास्थ्यकर्मीलाई क्रिया विदा र सुत्केरी विदा बाहेक अन्य बिदा नदिइने चन्दले बताउनुभयो ।
उपमहानगरपालिकाले वडा स्तरसम्म रेपिड रेस्पोन्स टिम र विपद ब्यवस्थापन समिति समिति गठन गर्ने भएको छ । तीन दिनभित्र समिति गठन भइसक्ने चन्दले बताउनुभयो । छलफलको निर्णय अनुसार स्वास्थ्य संस्थाले औषधीको हालसम्मको विवरण उपमहानगरपालिकामा तत्काल पठाउने र हेल्थ डेस्कमा भएको चेकजाँचको विवरण पनि सोही साझ बुझाइने भएको छ ।
कोरोना भाइरस विश्वब्यापी समस्याको रुपमा देखिएको भन्दै उपमहानगरपालिकाले गाउँगाउँ र टोलटोलमा सचेतना अभियानलाई थप प्रभावकारी रुपमा सञ्चालन गर्ने भएको छ । कोरोना विरुद्ध स्वास्थ्यकर्मीको मनोबल उच्च राख्न छलफल कार्यक्रम गरिएको चन्दले बताउनुभयो । छलफलमा स्वास्थ्यकर्मीहरुले आफुहरुका लागि आवश्यक श्रोत साधन र उपकरण उपलब्ध हुनुपर्ने माग गरेका छन् । नेपालगञ्ज उपमहानगरपालिकाले जमुनाह नाका, नेपालगञ्ज विमानस्थल र कार्यालयमा हेल्थ डेस्क सञ्चालन गरेको छ ।